“Nimbus” ky variant i ri, pjesë e familjes Omicron, është vlerësuar si më ngjitës se pararendësit, por deri më tani nuk ka prova që të shkaktojë forma më të rënda klinike të sëmundjes. Vendet anëtare të Bashkimit Evropian, përfshirë Greqinë, po regjistrojnë një rritje të moderuar të rasteve me COVID-19, si pasojë e përhapjes së variantit më të ri, të identifikuar si NB.1.8.1 dhe i koduar me emrin Nimbus.
Sipas të dhënave të publikuara nga autoritetet greke të shëndetit publik, rritja e rasteve është vërejtur që nga mesi i muajit qershor, me një intensifikim të kërkesave për vizita mjekësore, shtim të testeve pozitive dhe një rritje me 15% të konsumit të barnave antivirale. Pavarësisht kësaj, presioni mbi sistemin spitalor mbetet i menaxhueshëm. Aktualisht, në Greqi janë të shtruar 82 pacientë, me 16 pranimet të reja të regjistruara në 24 orët e fundit.
Trendi i ngjashëm është konfirmuar edhe nga Qendra Evropiane për Parandalimin dhe Kontrollin e Sëmundjeve (ECDC), e cila njofton për një rritje të lehtë të qarkullimit viral në disa shtete të BE-së. Megjithatë, indikatorët kritikë si shtrimet në terapi intensive dhe normat e vdekshmërisë vijojnë të jenë të ulëta, çka sugjeron se sistemi shëndetësor nuk është ende në rrezik nga mbingarkesa.
Shqetësimi kryesor: Mbulimi i ulët vaksinal në grupet vulnerabël
Pavarësisht asaj që për momentin konsiderohet si një valë e kontrollueshme, ekspertët paralajmërojnë për një rrezik të shtuar në rast se përhapja e “Nimbus” do të përkojë me nivelet aktualisht të ulëta të vaksinimit, veçanërisht tek grupmoshat mbi 80 vjeç. Sipas ECDC-së, vetëm një shtet anëtar i BE-së ka arritur të vaksinojë më shumë se 80% të kësaj kategorie të popullsisë.
Ky boshllëk imunizimi në grupet më të rrezikuara shihet si një faktor potencial për komplikacione serioze në muajt në vijim, veçanërisht nëse përhapja e variantit do të shoqërohet me mutacione të reja ose shtim të rasteve simptomatike.
Përtej Evropës: Nimbus përhapet edhe në Azi dhe Amerikë
Në nivel global, varianti “Nimbus” është identifikuar edhe në rajone të tjera si Kina, Hong Kongu dhe Singapori. Deri tani, Organizata Botërore e Shëndetësisë (OBSH) nuk ka klasifikuar variantin si një “variant shqetësimi” (VoC), megjithëse po e monitoron nga afër për shkak të karakteristikave të larta të transmetueshmërisë.
Paralelisht, OBSH ka nën mbikëqyrje edhe variantin tjetër XFG, i cili po qarkullon në rreth 14% të rasteve në Azi Juglindore dhe në disa shtete të SHBA-së. As ky variant, megjithatë, nuk është shoqëruar me rritje të rasteve të rënda apo të vdekshmërisë.
Apeli i autoriteteve: Vigjilencë dhe mbrojtje për të cenueshmit
Përballë këtyre zhvillimeve, institucionet shëndetësore evropiane dhe ndërkombëtare po intensifikojnë thirrjet për kujdes dhe përmirësim të mbulimit vaksinal, sidomos për grupet e rrezikuara. Mjekët dhe epidemiologët theksojnë rëndësinë e vaksinimit përforcues dhe të trajtimit të hershëm me medikamente antivirale, në mënyrë që të parandalohet një rikthim i skenarëve të së kaluarës.
Në këtë fazë, nuk ka vend për alarm, por ekspertët këshillojnë një qasje të matur dhe të koordinuar, për të garantuar një verë të sigurt për popullatën evropiane dhe për të shmangur që pandemia të marrë sërish trajtat e një emergjence shëndetësore.
