Qeveria shqiptare ka hedhur për konsultim publik një projektligj të rëndësishëm për qytetarët dhe bizneset: rivlerësimi i pronave me një normë tatimore të reduktuar në 5%. Faza e re do të zgjasë nga 1 janari deri më 30 shtator 2026, duke krijuar mundësinë për të përafruar vlerën e pronave me çmimet aktuale të tregut.
Ky është procesi i pestë i këtij lloji brenda 13 viteve të fundit, ndërkohë që rivlerësimi i fundit (2020–2022) solli përfitime të ndjeshme: mbi 168 mijë pasuri të rivlerësuara dhe 14 miliardë lekë të ardhura për buxhetin e shtetit.
Çmimi i tatimit: nga 15% në 5%
Aktualisht, tatimi për rivlerësimin e pronës është 15%, por me hyrjen në fuqi të këtij drafti, ai do të reduktohet në 5% – një nivel më i favorshëm se edhe ai i fushatës së vitit 2022, ku norma ishte 3%.
Sipas relacionit zyrtar të Ministrisë së Financave:
“Ky projektligj do të ketë ndikim pozitiv në buxhetin e shtetit, duke sjellë të ardhura pa ndryshuar normat ekzistuese të taksave. Ai shihet si një instrument i qëndrueshëm dhe eficient për politikën fiskale.”
Përfshirja e pronave në legalizim dhe regjistrim
Projektligji parashikon gjithashtu përfshirjen e pasurive të paluajtshme që janë në proces regjistrimi ose legalizimi, duke zgjeruar mundësinë e rivlerësimit për kategori që më parë ishin të përjashtuara.
Kjo lëvizje vjen në një moment kur çmimet e tregut për pasuritë e paluajtshme janë rritur ndjeshëm, veçanërisht në zonat urbane si Tirana, Durrësi, Vlora dhe Saranda. Rivlerësimi do të ndihmojë në formalizimin e mëtejshëm të tregut dhe në rritjen e transparencës në transaksionet e pasurive.
Çmimet e reja të referencës për të gjitha qarqet
Ministria e Financave ka publikuar gjithashtu një hartë të re të çmimeve të referencës, që përfshin të gjitha qarqet e vendit dhe ndarjen e detajuar të 24 zonave të Tiranës, në të cilat vlera e pronave do të përditësohet në përputhje me realitetin aktual të tregut.
