Gazetari Elio Laze u arrestua në Tiranë pas një kallëzimi të paraqitur nga një zyrtar i Shëndetit Publik, i cili pretendon se i janë kërkuar 20 mijë euro në këmbim të ndalimit të publikimeve.
Sipas burimeve për BalkanWeb, kallëzimi është depozituar nga Klaus Shaqiri, i cili ka pretenduar se përmes artikujve në portalin Priza.al është ushtruar presion për përfitim financiar.
Hetimet janë kryer nga Prokuroria e Tiranës, nën drejtimin e prokurorit Asllan Bajramaj. Sipas organit të akuzës, arrestimi është realizuar pas veprimeve proaktive hetimore.
Në njoftimin paraprak theksohet se Laze dyshohet për veprën penale “Shtrëngim me anë të kanosjes për dhënie pasurie”. Hetimet vijojnë për të dokumentuar plotësisht rrethanat e rastit.
Çështja pritet të ndiqet nga autoritetet gjyqësore për vlerësimin e masës së sigurisë dhe për procedurat e mëtejshme ligjore.
