Gjykata e Tiranës ka caktuar masën e sigurisë “detyrim paraqitje” për 14 persona të arrestuar nga protesta e 10 shkurtit në bulevardin “Dëshmorët e Kombit”.
Prokuroria kishte kërkuar dy masa “arrest me burg”, tre “arrest në shtëpi” dhe për nëntë persona detyrim paraqitje. Megjithatë, gjykata vendosi që të gjithë të hetohen në gjendje të lirë me paraqitje të detyrueshme pranë autoriteteve.
Të arrestuarit dyshohen për kundërshtim të punonjësve të policisë, ushtrim dhune ndaj tyre, dëmtim të pronës shtetërore dhe hedhje molotovësh në drejtim të forcave të rendit dhe institucioneve.
Një ditë më parë, para Gjykatës së Tiranës dolën për masë sigurie edhe shtatë persona të mitur, ndaj të cilëve u vendos po ashtu “detyrim paraqitje”.
Ndryshe nga seanca e mëparshme, në ambientet e gjykatës nuk u raportua prani e përfaqësuesve politikë gjatë shqyrtimit të sotëm.
