Një tren me rreth 80 pasagjerë ka dalë nga shinat mëngjesin e sotëm në Zvicër, pasi u godit nga një ortek bore pranë fshatit Goppenstein, në kantonin jugperëndimor të Valais.
Sipas policisë lokale, ngjarja ndodhi rreth orës 07:00, kur disa vagona u nxorën jashtë linjës hekurudhore. Në zonë u dërguan ambulanca dhe helikopterë shpëtimi për të arritur tek pasagjerët në kushte të vështira atmosferike.
Autoritetet njoftuan rreth orës 10:00 se 30 persona ishin evakuuar, ndërsa paralajmëruan se “lëndime janë të mundshme”. Operacioni i kërkim-shpëtimit vijon për verifikimin e plotë të situatës.
Vetëm javën e kaluar, shërbimet kompetente kishin paralajmëruar rrezik të lartë ortekësh në kanton, pas reshjeve intensive të borës në Alpe, duke rritur nivelin e alarmit për transportin hekurudhor në zonat malore.
