Një sulm kibernetik ndaj Ministrisë të Brendshme Italiane ka çuar në ekspozimin e të dhënave të rreth 5 mijë agjentëve të Digos, përfshirë emra, funksione dhe seli operative. Sipas raportimeve, hetuesit dyshojnë për përfshirje të aktorëve të lidhur me sferën e inteligjencës kineze.
Të dhënat dyshohet se janë marrë pas një depërtimi të heshtur në rrjetet e ministrisë gjatë viteve 2024–2025. Objektivi, sipas burimeve hetimore, nuk ishte sabotimi, por identifikimi i strukturave që hetojnë terrorizmin, komunitetet e huaja dhe disidentët kinezë në Itali.
Policia italiane konfirmoi se sulmet synonin “lokalizimin e qytetarëve kinezë disidentë dhe identifikimin e agjentëve të angazhuar në hetime ndaj grupeve kineze”.
Digos është njësia speciale hetimore e policisë italiane që merret me antiterrorizmin, ekstremizmin dhe çështjet e sigurisë kombëtare.
Rasti ka ndikuar drejtpërdrejt në bashkëpunimin me autoritetet kineze. Takimet mes ministrit italian Matteo Piantedosi dhe homologut Wang Xiaohong kishin hapur një plan trevjeçar bashkëpunimi kundër krimit të organizuar. Megjithatë, pas zbulimit të incidentit, Italia ka ngrirë disa forma bashkëpunimi operacional.
Sipas analistëve të sigurisë kibernetike, operacione të ngjashme i atribuohen strukturës së njohur si Ink Dragon, e përmendur në raporte ndërkombëtare për aktivitete të mbledhjes së inteligjencës.
Çështja po trajtohet si problem i sigurisë kombëtare dhe diplomacisë, ndërsa hetimet vijojnë.
