Sipas raportimeve të mediave amerikane, Shtëpia e Bardhë është informuar se kapacitetet ajrore dhe detare janë në pozicion operacional pas një shtimi të ndjeshëm të pranisë ushtarake në Lindjen e Mesme. Në ditët e fundit janë zhvendosur mjete ajrore nga baza në Mbretërinë e Bashkuar, përfshirë avionë luftarakë dhe tankerë furnizimi, ndërsa aeroplanmbajtësja USS Gerald Ford pritet të pozicionohet në rajon.
Zyrtarë të lartë të sigurisë kombëtare dhe pentagoni, janë mbledhur në Situation Room për të shqyrtuar zhvillimet dhe opsionet e mundshme. Presidenti është informuar gjithashtu mbi rezultatet e bisedimeve indirekte me Iranin të zhvilluara në Gjenevë. Negociatat, që zgjatën disa orë, nuk prodhuan një marrëveshje konkrete, megjithëse palët folën për parime udhëzuese dhe vazhdim të dialogut.
Shtëpia e Bardhë ka theksuar se diplomacia mbetet opsioni i parë, por nuk ka përjashtuar veprime ushtarake. Sekretari amerikan i Shtetit, Marco Rubio, pritet të konsultohet me kryeministrin izraelit Benjamin Netanyahu në fund të muajit, në një moment kur shqetësimet për përshkallëzim rajonal janë rritur.
Në anën tjetër, Irani ka ndërmarrë masa për forcimin e objekteve të tij bërthamore, sipas analizave të publikuara nga institute të pavarura të sigurisë. Vëzhguesit theksojnë se çdo vendim për përdorim force do të kishte pasoja të gjera gjeopolitike, duke përfshirë reagime nga aleatët rajonalë dhe ndikim në stabilitetin e tregjeve energjetike.
Ndërsa presidenti vijon konsultimet me këshilltarët e tij dhe aleatët ndërkombëtarë, mbetet e paqartë nëse do të ketë një vendim përpara fundjavës. Paqartësia mbi objektivat strategjikë dhe kohën e mundshme të një veprimi ka shtuar tensionet, në një fazë ku diplomacia dhe presioni ushtarak po ecin paralelisht.
