Ministria e Mbrojtjes e Meksikës konfirmoi se operacioni që çoi në vdekjen e Nemesio Oseguera Cervantes, i njohur si “El Mencho”, u realizua në kuadër të bashkëpunimit dypalësh me Shtetet e Bashkuara, të cilat ofruan informacion plotësues inteligjence.
Lideri i Jalisco New Generation Cartel (CJNG) u vra së bashku me gjashtë anëtarë të tjerë gjatë një ndërhyrjeje të forcave speciale në Tapalpa, Jalisco. Sipas autoriteteve, tre ushtarakë mbetën të plagosur. Ministria deklaroi se trupat u sulmuan gjatë operacionit dhe “iu kundërpërgjigjën agresionit”, duke rezultuar në katër të vrarë në vendngjarje dhe tre të tjerë që humbën jetën gjatë transportimit ajror drejt Mexico City.
Ambasada e SHBA në Meksikë sqaroi se operacioni SHBA–Meksikë u planifikua dhe u ekzekutua nga forcat meksikane, ndërsa një zyrtar amerikan konfirmoi mbështetjen përmes shkëmbimit të inteligjencës. Omar Garcia Harfuch falënderoi ushtrinë dhe forcën ajrore për ndërhyrjen.
Pas operacionit, autoritetet dislokuan trupa të ushtrisë dhe Gardës Kombëtare në Jalisco dhe shtetet fqinje për të përforcuar sigurinë, pas një vale dhune me bllokime rrugësh dhe automjete të djegura.
El Mencho ishte objektivi kryesor i kërkimit për Meksikën dhe SHBA-në. Drug Enforcement Administration kishte ofruar një shpërblim prej 15 milionë dollarësh për informacion që çonte në kapjen e tij. Në muajt e fundit, disa figura kyçe të rrethit të tij, përfshirë Abigael Gonzalez Valencia, janë arrestuar ose ekstraduar, ndërsa djali i tij po vuan burgim të përjetshëm në SHBA.
