Kryeministri Edi Rama deklaroi gjatë mbledhjes së Grupit Parlamentar të Partisë Socialiste se Agjencia Kombëtare e Shoqërisë së Informacionit (AKSHI) është një institucion “krenarie” dhe nuk duhet, sipas tij, të kthehet në objekt presioni publik e psikologjik ndaj punonjësve.
Duke iu referuar ish drejtoreshës të AKSHI-t, Mirlind Karçanaj, Rama tha se ndaj saj janë ngritur akuza publike për pasuri, ndërsa theksoi se ajo jeton me qira. Kryeministri vuri theksin te parimi i prezumimit të pafajësisë dhe e drejta për një hetim të plotë e të paanshëm.
Ai përmendi gjithashtu rastin e drejtuesit të Korporatës Elektroenergjetike Shqiptare (KESH), duke ngritur pyetjen mbi pasojat nëse persona nën masa sigurie rezultojnë të pafajshëm. Sipas Ramës, hetimet e zgjatura dhe pasiguria ligjore mund të ndikojnë në vendimmarrjen dhe funksionimin e administratës publike.
Deklaratat vijnë në një klimë debati të shtuar politik mbi proceset hetimore dhe reformën në drejtësi, ndërsa çështjet në fjalë mbeten në shqyrtim nga organet kompetente.
