Televizioni shtetëror i Iranit konfirmoi herët të dielën, sipas orës lokale, vdekjen e Ali Khamenei, një ditë pas sulmeve të ndërmarra nga Shtetet e Bashkuara dhe Izraeli ndaj objektivave në territorin iranian.
Gjatë transmetimit të drejtpërdrejtë, një spiker i televizionit shtetëror shpërtheu në lot ndërsa lexonte deklaratën zyrtare për ndarjen nga jeta të liderit 86-vjeçar, i cili drejtoi Iranin që nga viti 1989.
Autoritetet iraniane shpallën 40 ditë zie kombëtare dhe njoftuan se do të organizohen ceremoni zyrtare në Teheran dhe qytete të tjera të vendit. Institucionet shtetërore pritet të ulin flamujt në gjysmë shtize, ndërsa pritet të shpallet edhe kalendari i ceremonive mortore.
Njoftimi vjen në një moment tensioni të lartë rajonal, pas operacioneve ushtarake të ndërmarra nga SHBA dhe Izraeli dhe kundërgoditjeve iraniane në disa vende të Lindjes së Mesme. Autoritetet në Teheran nuk kanë dhënë ende detaje të plota mbi rrethanat e vdekjes.
