Gjatë 24 orëve të fundit, janë raportuar tetë vatra zjarri në disa qarqe të vendit, të cilat janë neutralizuar falë ndërhyrjes së shpejtë dhe të koordinuar të strukturave të Mbrojtjes Civile. Njoftimi vjen nga Qendra Kombëtare Operacionale pranë Agjencisë Kombëtare të Mbrojtjes Civile, e cila ka marrë informacion të detajuar nga njësitë vendore dhe ato qendrore të sistemit të emergjencave.
Në operacionet për shuarjen e flakëve janë angazhuar gjithsej 78 efektivë operativë, të mbështetur nga 11 automjete zjarrfikëse dhe mjete të tjera ndihmëse të tipit transportues dhe gërmues. Territoret më të prekura ishin qarqet Fier, Lezhë, Vlorë, Shkodër, Tiranë dhe Berat, ku ndërhyrja e forcave në terren bëri të mundur izolimin dhe fikjen e plotë të vatrave.
Sipas parashikimit të Institutit të Gjeoshkencave, sot pritet një nivel “i lartë” rreziku për zjarre në qarkun e Fierit, ndërsa për pjesën tjetër të vendit, niveli i rrezikut konsiderohet “i moderuar”.
Ministria e Mbrojtjes, në bashkëpunim me Agjencinë Kombëtare të Mbrojtjes Civile, u bën thirrje qytetarëve të tregojnë kujdes të shtuar në këto ditë me temperatura të larta dhe të raportojnë menjëherë çdo vatër të dyshuar zjarri pranë strukturave përkatëse, për të parandaluar përhapjen dhe përkeqësimin e situatës.
