Në një takim joformal me gazetarët në ambientet e “Casa Milan”, drejtori sportiv, Igli Tare, hodhi dritë mbi vizionin e klubit për merkaton e verës dhe objektivat për sezonin e ardhshëm.
“Ne nuk po bëjmë një revolucion, por synojmë të shtojmë elementë funksionalë që do të forcojnë identitetin tonë të lojës”, deklaroi Tare.
Prioriteti kryesor, sipas tij, është mesfusha, në përputhje me kërkesat e trajnerit Massimiliano Allegri për më shumë cilësi dhe balancë në ndërtimin e lojës. Në repartin ofensiv, Tare tregoi se klubi është në kërkim të një qendërsulmuesi klasik, të ngjashëm me profilin e Olivier Giroud. Ai përjashtoi kandidatura si Vlahovic apo Osimhen, duke theksuar se ato nuk janë në planet e klubit.
Sa i përket mbrojtjes, Tare komentoi mbi largimin e mundshëm të Theo Hernandez, duke e përshkruar si një dëshirë të vetë lojtarit për të provuar një eksperiencë të re. Ndërkohë, portieri Mike Maignan nuk do të largohet, pavarësisht interesimit nga Chelsea: “Ai mbetet pjesë e Milanit,” u shpreh ai.
Sipas planit aktual, Milani synon të afrojë pesë përforcime: dy mesfushorë (përveç emrit të shumëpërfolur të Luka Modric), dy mbrojtës krahu – një për secilën anë – si dhe një sulmues qëndror.
Megjithatë, numri i afrimeve mund të shkojë deri në shtatë, në varësi të largimeve të mundshme në mbrojtje apo në repartin ofensiv. Përsa i përket mundësisë së largimit të Musah, Tare u shpreh: “Po kërkojmë profile të ndryshme për një mesfushë me tre lojtarë, që t’i përshtaten stilit që synojmë të ndjekim”.
Milani po ecën drejt një ndërtimi të kujdesshëm dhe të qëndrueshëm, me qëllim krijimin e një skuadre të balancuar dhe konkurruese, në përputhje me filozofinë e trajnerit të ri.
