Marina e SHBA ka dërguar në Lindjen e Mesme aeroplanmbajtësen USS Gerald R. Ford, e konsideruar si më e avancuara në flotën amerikane, në një moment rritjeje të tensioneve me Iranin.
Sipas raportimeve anija u nis nga Karaibet drejt rajonit, ku ndodhet tashmë USS Abraham Lincoln. Ford kishte operuar që prej nëntorit në Karaibe, në kuadër të operacioneve amerikane kundër trafikut të drogës pranë Venezuelës.
Vendosja e një aeroplanmbajtëseje të dytë në rajon vjen ndërsa Presidenti Donald Trump po shton presionin ndaj Iranit për të arritur një marrëveshje që kufizon programin e tij bërthamor. Në deklarata të fundit, Trump ka paralajmëruar se një “armadë e madhe” është në lëvizje drejt rajonit dhe se udhëheqësi suprem iranian, Ali Khamenei, “duhet të jetë shumë i shqetësuar”.
Lëvizjet ushtarake po monitorohen nga afër nga aleatët dhe rivalët në rajon, ndërsa situata mbetet e ndjeshme për sigurinë në Lindjen e Mesme.
