Kërkesa e autoriteteve ruse që linjat ajrore të dorëzojnë paraprakisht listat me emrat dhe të dhënat personale të pasagjerëve në fluturimet që kalojnë mbi territorin e Rusisë po shkakton shqetësime në Bashkimin Evropian.
Sipas burimeve, ekziston frikë se figura “të ndjeshme” perëndimore, përfshirë diplomatë, shkencëtarë apo përfaqësues institucionalë, mund të ndalohen me pretekste sigurie nëse avioni devijohet ose detyrohet të ulet.
Dokumenti i fundit i Ministrisë ruse të Transportit kërkon që kompanitë ajrore të dorëzojnë emrin, mbiemrin, dokumentin e identifikimit, datën e lindjes, shtetësinë dhe kodin e rezervimit, tre herë: 24 orë para nisjes, 15 minuta pas mbylljes së check-in dhe 40 minuta pas ngritjes.
Rasti i vitit 2021 me devijimin e fluturimit të Ryanair në Minsk mbetet precedent referues për zyrtarët perëndimorë. Ndërkohë, Komisioni Evropian ka sqaruar se nuk ka bazë ligjore për të kufizuar udhëtimet private të stafit, ndërsa paralajmërimet për qytetarët mbeten kompetencë e shteteve anëtare.
Sipas të dhënave të platformave të aviacionit, linjat ajrore kineze operojnë mesatarisht mbi 100 fluturime në ditë mes Kinës dhe Evropës, duke përfituar nga itineraret mbi hapësirën ajrore ruse.
