Spanja do të ndalojë përdorimin e rrjeteve sociale për fëmijët nën moshën 16 vjeç. Lajmi u bë publik këtë mëngjes nga kryeministri Pedro Sanchez, gjatë një samiti të liderëve botërorë në Emiratet e Bashkuara Arabe.
Sanchez deklaroi se fëmijët janë sot tepër të ekspozuar ndaj abuzimit, dhunës dhe manipulimit online, duke e cilësuar hapësirën digjitale si të papërshtatshme për të miturit.
“Sot, fëmijët tanë përballen me varësi, pornografi, dhunë dhe manipulim. Kjo nuk është më e pranueshme,” u shpreh ai.
Vendimi i Spanjës vjen pas masave të ngjashme në Australia, e cila ndaloi rrjetet sociale për nën-16-vjeçarët në dhjetor, si dhe pas miratimit të një projektligji në France, që ndalon aksesin për fëmijët nën 15 vjeç.
Sipas qeverisë spanjolle, platformat do të detyrohen të aplikojnë verifikim real të moshës, jo thjesht deklarime formale. Javën e ardhshme pritet të prezantohet një projektligj i ri që do t’i mbajë drejtuesit e rrjeteve sociale përgjegjës për përmbajtje të paligjshme dhe gjuhë urrejtjeje.
Autoritetet theksojnë se shqetësimi kryesor lidhet me ndikimin negativ të rrjeteve sociale në zhvillimin psikologjik të fëmijëve dhe rritjen e problemeve të shëndetit mendor.
